ཕྱི་ཟླ་ ༣ – ༢༠༡༨

ཁ་སང་ཕྱི་ཚེས་བཅུའི་ཉིན་ད་ལོའི་ཡུ་རོབ་བོད་མིའི་ལས་འགུལ་ཆེན་མོ་སྟེ་ཡུ་རོབ་བོད་དང་མཉམ་དུ་ཡོད་ཅེས་པའི་ལས་འགུལ་འདིའི་དངོས་གཞིའི་ལས་འགུལ་ཏེ་གསུམ་བཅུ་དུས་དྲན་ཐེངས་༥༩་པ་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་ཡོད་པའི་མཉམ་འབྲེལ་རྒྱལ་ཚོགས་ཀྱི་ཐང་ཆེན་དུ་སྲུང་གཙི་གནང་འདུག

དེ་རིང་ཕྱི་ཚེས་བརྒྱད་ཉིན་གྱི་ཕྱི་དྲོའི་ཆུ་ཚོད་གཉིས་པ་ནས་གསུམ་པའི་བར་དུ་དབུས་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་སྡེ་ཚན་གྱི་འགན་འཛིན་བསྟན་པ་རྒྱལ་མཚན་ལགས་གཉིས་ཀྱིས་བོད་ཀྱི་འགྲོ་བ་མིའི་ཐོབ་ཐང་དང་ཁོར་ཡུག་ཐད་ལ་གསུང་བཤད་གནང་འདུག

དེ་རིང་ཕྱི་ཚེས་བདུན་གྱི་སྔ་དྲོ་ས་གནས་ཆུ་ཚོད་༡༡ ནས་ཇི་ནི་ཝའི་Press Club ནང་དུ་གསུམ་བཅུའི་དུས་དྲན་དང་འབྲེལ་བའི་གསར་འགོད་ལྷན་ཚོགས་ཤིག་འཚོགས་པར་ས་གནས་གསར་འགོད་པ་ཁག་ཅིག་མཉམ་ཞུགས་བྱས་ནས་དྲི་བ་དྲི་ལན་གནང་།

གསུམ་བཅུའི་དུས་དྲན་ཐེངས་ ༥༩ པའི་ལས་འགུལ་ཆེན་མོའི་སྔོན་འགྲོའི་ལས་འགུལ་དེ་རིང་ཕྱི་ལོ་ ༢༠༡༨།༠༣།༠༧ ནས་དབུ་ཚུགས་པ་དང་དེ་ཡང་དེ་རིང་སྔ་དྲོ་ཚོུད་༠༩ ཐོག་རི་ཀོན་ཆོས་འཁོར་དགོན་དུ་མཁན་རིན་པོ་ཆེ་མཆོག་དབུས་པའི་དགོན་པའི་དགེ་འདུན་པ་རྣམས་དབུ་བཞུགས་ཐོག་ལས་འགུལ་ཆེན་མོར་བགེགས་དབང་བར་ཆད་མི་ཡོང་བར་ལམ་ལྷོང་ཚག་ཚུད་ཡོང་ཆེད་དཔལ་ལྡན་ལྷ་མོའི་བསྐང་གསོ་རྒྱས་པ་ཞིག་འབུལ་བ་དང་སྦྲགས་ལས་འགུལ་ཆེན་མོའི་སྔོན་འགྲོའི་ལས་འགུལ་ཉིན་དང་པོ་དབུ་འཛུགས་ཞུས།