སློབ་དཔོན་ཡོན་ཏན་འོད།
སློབ་དཔོན་དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་སློབ་དཔོན་ཡོན་ཏན་འོད་ནི། ཡུལ་བཅོམ་བརླག་ཏུ་བྲམ་ཟེའི་རིགས་སུ་སྐུ་འཁྲུངས། རིག་བྱེད་དང་བསྟན་བཅོས་མཐའ་དག་ལ་ལེགས་པར་སྦྱངས། ཕྱིས་སུ་རབ་ཏུ་བྱུང་ཞིང་བརྙེན་པར་རྫོགས་ནས་སློབ་དཔོན་དབྱིག་གཉེན་གྱི་དྲུང་དུ་ཐེག་དམན་གྱི་སྡེ་སྣོད་གསུམ་དང་ཐེག་པ་ཆེན་པོའི་མདོ་སྡེ་དུ་མ་ལ་ཡང་མཁས་པར་སྦྱངས། སྡེ་པ་ཐ་དད་པའི་འདུལ་བ་མཐའ་དག་ལ་མཁས་པར་མཁྱེན་ནས། འདུལ་བ་འབུམ་སྡེ་རྟག་ཏུ་ཐུགས་ནས་འདོན་པར་མཛད། ཡུལ་བཅོམ་བརླག་གི་གཙུག་ལག་ཁང་ཨ་གྲ་པུ་རི་ཞེས་པར་བཞུགས། ལྷན་གཅིག་ཏུ་གནས་པའི་དགེ་སློང་སྟོང་ཕྲག་ལྔ་རེ་ཡོད་ཅིང་། ཐམས་ཅད་བསྡམ་བྱའི་ཉེས་བྱས་ཕྲ་མོས་ཀྱང་མ་གོས་པའི་ཚུལ་ཁྲིམས་རྣམ་པར་དག་ཡོད་ལ། མདོ་སྡེ་འཛིན་པ་དང་། མ་མོ་འཛིན་པའང་མང་པོ་ཡོད། འདུལ་བ་འབུམ་སྡེ་ཐེག་པ་ནི་ལྔ་བརྒྱ་ཙམ་མོ། ཚུལ་ཁྲིམས་རྣམ་པར་དག་པའི་སྟོབས་ཀྱིས་རྒྱལ་པོ་ཤྲི་ཧར་ཤའི་བློན་པོ་མང་ཏང་གར་ཛ་བྱ་བ་ལན་ཅིག་རྒྱལ་པོའི་ཆད་པས་མིག་ཕྱུང་བ་ཡང་སློབ་དཔོན་འདིས་སྨོན་ལམ་གྱི་སྟོབས་ཀྱིས་སོར་ཆུད། རྒྱལ་པོའི་བླ་མར་གྱུར་པས་ཉིན་ར་བཞིན་ཡོ་བྱད་དཔག་ཏུ་མེད་པའི་འདུ་བ་བྱུང་ཡང་དེ་མ་ཐག་ཐམས་ཅད་དགེ་བའི་རྒྱུར་བསྔོས་ཏེ། རང་ཉིད་སྦྱངས་པའི་ཡོན་ཏན་ལས་ཉམས་པ་མི་མངའ་ཞིང་། བསྟན་བཅོས་ནི་མདོ་རྩ་བ་དང་། འདུལ་བ་ལས་བརྒྱ་པ། ཀརྨ་ཤཏཀམ་སོགས་མཛད་དོ།