དཔའ་བོ་དཔའ་མོ་རྗེས་དྲན་ཐེངས་བཞི་བ་སུད་སིར་འཚོག

གོང་ཚེས་ཉིན་སུད་སི་གནས་སྡོད་ནམ་ཁོ་རྫ་རྡོ་ལགས་ཀྱིས་གོ་སྒྲིག་འོག ད་ལྟའི་བར་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་དུས་རབས་དང་ལོ་རྒྱུས་ཀྱིས་བརྗེད་མི་སྲིད་པའི་རྗེས་དྲན་མཛད་སྒོ་ཞིག་བསྡུས་ཡོད་འདུག་ཅིང་། མཛད་སྒོའི་ཐོག་སུད་སིའི་རི་ཁོན་མཁན་རིན་པོ་ཆེ་མཆོག་དང་། བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད། ཡུ་རོབ་བོད་རིགས་གཞོན་ནུའི་མཐུན་ཚོགས་ཀྱི་ཚོགས་གཞོན་རྣམ་མཚོ་ལགས། བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་མཁར་འཕག་ལགས། དེ་བཞིན་སུད་སིའི་མི་མང་ཉིས་བརྒྱ་ཙམ་མཉམ་ཞུགས་ཐོག་ཡུ་རོབ་གཙོས་རྒྱལ་སྤྱིའི་སྤྱི་ཚོགས་ནང་བོད་ཀྱི་གནད་དོན་དང་། རྒྱལ་གཅེས་དཔའ་བོ་དཔའ་མོ་རྣམས་ཀྱི་རླབས་ཆེན་བློས་གཏོང་གི་བརྒྱུད་རིམ་ངོ་སྤྲོད་དང་། རྒྱལ་གཅེས་དཔའ་བོ་དཔའ་མོ་རྣམས་ཀྱི་ཁ་ཆེམས་སོགས་དྲིལ་བསྒྲགས་ཆེད། ཨ་རིར་གནས་བཞུགས་སྒྱུ་རྩལ་པ་དང་གཞས་པ་གྲགས་ཅན་རྟ་མགྲིན་ལགས་དང་། སུད་སི་གནས་བཞུགས་གཞས་པ་གཞས་པ་ཁག་ཅིག་གདན་འདྲེན་ཞུས་ཏེ། གཞས་སྣ་དང་སྒྱུ་རྩལ་གྱི་ལམ་ནས་དཔའ་བོ་དཔའ་མོ་རྗེས་དྲན་དང་། དེ་བཞིན་སྙན་ངག་གྱེར་འདོན། དཔའ་བོ་དཔའ་མོ་རྗེས་དྲན་དང་འབྲེལ་བའི་གཏམ་བཤད། མ་འོངས་པའི་བོད་ཀྱི་རྩ་དོན་འཐབ་རྩོད་ཀྱི་ཁ་ཕྱོགས་ལ་བསམ་ཚུལ་བརྗེ་རེས་སོགས་གནང་ཡོད་འདུག

ནམ་ཁོ་རྫ་རྡོ་ལགས་ཀྱིས་ཐེངས་འདིའི་མཛད་སྒོ་འདི་འདྲ་ཞིག་གོ་སྒྲིག་ཞུ་དགོས་པའི་དམིགས་ཡུལ་ཐད་ནས་བརྗོད་དོན། མཛད་སྒོ་འདིའི་དམིགས་ཡུལ་གཙོ་བོ་ནི། བོད་རྒྱ་ལག་དུ་ཚུད་པ་ནས་ད་ལྟའི་བར་བོད་ཀྱི་ཆོས་དང་རིག་གནས། ཆབ་སྲིད་དང་ཁོར་ཡུག་སོགས་སྲུང་སྐྱོབ་ཀྱི་ཆེད་དུ་ཚེ་སྲོག་ལོངས་སྤྱོད་བློས་གཏོང་གནང་མཁན་སྤྱི་དང་། དེ་བཞིན་རྒྱ་ནག་དམར་པོའི་གདུག་རྩུབ་འོག་མནར་གཅོད་སྡུག་བསྔལ་མྱོང་བཞིན་པའི་ཆབ་སྲིད་བཙོན་པ་ཡོངས་ལ་རྗེས་དྲན་དང་། རྗེས་དྲན་འདི་ལ་བརྟེན་ནས་བོད་ཀྱི་གཞོན་སྐྱེས་མི་རབས་གསར་བ་རྣམས་ཀྱིས་ཁོང་ཚོའི་རླབས་ཆེན་བློས་གཏོང་གི་བརྒྱུད་རིམ་དང་། ཁོང་ཚོའི་ཁ་ཆེམས་སོགས་ཅི་ཡིན་ངོ་ཤེས་ཐབས་དང་། ཁོང་ཚོའི་རླབས་ཆེན་གྱི་བློས་གཏོང་འདི་དུས་རབས་དང་ལོ་རྒྱུས་ཀྱིས་བརྗེད་ཐབས་མེད་པའི་ལོ་རྒྱུས་ཀྱི་དྲན་ཤིང་དུ་ཉར་ཐབས་ཡོང་རྒྱུ་དེ་ཡིན། ཅེས་སོགས་གསུང་བྱུང་། 

དཔའ་བོ་དཔའ་མོ་རྗེས་དྲ་གྱི་མཛད་སྒོ་འདི་ནི་ནམ་ཁོ་རྫ་རྡོ་ལགས་ཀྱིས་༢༠༡༤ ལོ་ནས་དབུ་འཛུགས་གནང་ཞིང་། ལོ་ལྟར་དཔའ་བོ་དཔའ་མོ་རྗེས་དྲན་ཐེངས་རེར་འཚོག་བཞིན་ཡོད་པ་དང་། བགྲོ་གླེང་དང་། རི་མོ། སྙན་ངག གཞས་སྣ་སོགས་སྒྱུ་རྩལ་འདྲ་མིན་གྱི་ལམ་ནས་རྗེས་དྲན་མཛད་སྒོ་གོ་སྒྲིག་ཞུ་བཞིན་པ་ཡིན་འདུག

གསར་འགོད་པ། ཙ་ཡུས་ཕུན་ཚོགས།