བོད་རིགས་གཞས་པ་ཞིག་འཛིན་བཟུང་།

ཟླ་འདིའི་ཚེས་༡༡ ཉིན་བོད་གཞུང་གི་དྲ་གནས་ཐོག་གནས་ཚུལ་སྤེལ་བ་ལྟར་ན། རང་ལོ་༡༩ ཙམ་ལ་སོན་པའི་ན་གཞོན་གཞས་པ་ཆོས་མགོན་ལགས་འདི་ལོའི་ཕྱི་ཟླ་༩ ཚེས་༢༥ ཉིན་རྒྱ་ནག་གཞུང་གི་སྤྱི་བདེ་འབྲེལ་ཡོད་ཚན་པས་དོགས་གཞིའི་འོག་འཛིན་བཟུང་བྱས་ཡོད་འདུག

དེ་ཡང་གཞས་པ་ཆོས་མགོན་ལགས་ནི་སྐྱེས་ཡུལ་ཁམས་འཇོ་མདའ་རྫོང་ཁོངས་ནས་ཡིན་ཞིང་། མང་ཚོགས་ནས་ཁོང་གིས་བཏང་བའི་གཞས་ལ་ཧ་ཅང་དགའ་མོས་བྱེད་བཞིན་ཡོད་པ་མ་ཟད། ཡོངས་གྲགས་སུ་གཞས་པ་ཀུན་དགའ་ཆུང་བ་ཞེས་འབོད་སྲོལ་ཡོད་འདུག དེར་བརྟེན་རྒྱ་ནག་གཞུང་གིས་དེ་སྔ་ནས་ས་གནས་འབྲེལ་ཡོད་ཚན་པས་ཁོང་དོགས་གཞི་བྱ་ཡུལ་ཞིག་ཏུ་གྱུར་ཡོད་པ་དང། ཉེ་དུས་ཁོང་ཁམས་ནས་ལྷ་ས་བརྒྱུད་གླུ་གཞས་འགྲན་ཚོགས་ཤིག་ཏུ་མགྲོན་འབོད་བྱུང་བ་ལྟར་དེར་འབྱོར་སྐབས་གློ་བུར་འཛིན་བཟུང་བྱས་པའི་གནས་ཚུལ་ཐོན་ཡོད་པར་བརྟེན། འབྲེལ་ཡོད་ཚོས་ད་ལྟ་བར་རྩད་གཅོད་བྱས་ཀྱང་ཁོང་བཙོན་ཁང་གང་ཞིག་ཏུ་བཀག་ཉར་བྱས་ཡོད་མེད་སོགས་ཀྱི་གནས་སྟངས་གང་ཡང་ཤེས་རྟོགས་མེད་པར་གྱུར་ཡོད་འདུག །