སུད་སི་བོད་ཀྱི་བུད་མེད་ལྷན་ཚོགས་ནས་བུད་མེད་སྒེར་ལངས་ཐེངས ༥༣ པ་སྲུང་བརྩི།

༄༅། །སུད་སི་བུད་མེད་ལྷན་ཚོགས་ཀྱི་གོ་སྒྲིག་འོག་མདང་དགོང་འཛུ་རིགས་ཁྲོམ་གཞུང་དུ།མི་མང་༣༠༠ ལྷག་མཉམ་འཛོམས་ཐོག་བོད་མི་ཚོས་བདེན་དོན་གྱི་ཆེད་དུ་གཅིག་རྗེས་གཉིས་བསྟུད་དུ་རང་ལུས་མེར་བསྲེགས་གཏོང་བའི་རྒྱལ་གཅེས་དཔའ་བོ་དཔའ་མོ་རྣམས་དང་ཉེ་ལམ་མདོ་སྨད་རྨ་ཆུ་རྫོང་གི་བོད་རིགས་བུ་མོ་ཚེ་རིང་སྐྱིད་ལགས་དང་། རྔ་པ་རྫོང་གི་བུད་མེད་རིན་ཆེན་གཉིས་ཀྱིས་རང་ལུས་མེར་བསྲེགས་བཏང་སྟེ།འདས་གྲོངས་སུ་ཕྱིན་པར་གདུང་སེམས་མཉམ་སྐྱེད་མཚོན་ཆེད་མར་མེ་ཁྲོམ་སྐོར་དང་ཞི་རྒོལ་སྐད་འབོད་གནང་སོང་ལ་ ངོ་རྒོལ་སྐད་འབོད་ཀྱི་ལས་འགུལ་དེའི་སྟེང༌། རི་ཀོང་དགོན་པའི་མཁན་རིན་པོ་ཆེ་མཆོག་དང་སུད་སི་བོད་རིགས་ཚོགས་པའི་ཚོགས་གཞོན་གཞིས་རྩེ་ཚང་བློ་བཟང་ལགས་དང་ ༢༠༡༡ ལོའི་བོད་ཀྱི་མཛངས་མ་བུ་མོ་བསྟན་འཛིན་དབྱངས་སྐྱིད་གཙོས་བའི་བོད་མི་དང་བོད་དོན་རྒྱབ་སྐྱོར་པ་བཅས་མི་གྲངས་ ༣༠༠ ལྷག་མཉམ་ཞུགས་གནང་ཡོད་འདུག་ ལས་འགུལ་ཐོག་སུད་སི་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་མཆོག་གིས་ལས་འགུལ་ངོ་སྤྲོད་དང་འབྲེལ་ཏེ།རྨ་ཆུ་རྫོང་དང་རྔ་པ་རྫོང་གཉིས་སུ་བྱུང་བའི་མེར་བསྲེགས་དོན་རྐྱེན་དེའི་གནས་སྟངས་སྐོར་མང་ཚོགས་ལ་ངོ་སྤྲོད་གནང་སོང་།དེའི་རྗེས་བུད་མེད་ལྷན་ཚོགས་ཀྱི་བུད་མེད་སྒེར་ལངས་དུས་དྲན་ང་གསུམ་པའི་ཡོངས་ཁྱབ་གསལ་བསྒྲཊ་ངོ་སྤྲོད་གནང་སོང་། བུད་མེད་ལྷན་ཚོགས་ཀྱི་བུད་མེད་སྒེར་ལངས་དུས་དྲན་ང་གསུམ་པའི་ཡོངས་ཁྱབ་གསལ་བསྒྲཊ་ནང་འཁོད་དོན། “བུད་མེད་ལྷན་ཚོགས་ཀྱིས་ཕྱི་ལོ་༢༠༡༡ ཟླ་༣ ནས་རྒྱ་གཞུང་གིས་བོད་མིར་སྔར་ལས་དམ་དྲག་དང་། རྒྱའི་བཙོན་འོག་ཏུ་ཡོད་པའི་ཆབ་སྲིད་བཙོན་པ་༨༥༠ ཡི་བདེ་འཇགས་ཐོག་སེམས་འཚབ་བྱེད་ཀྱི་ཡོད་ལ། བོད་ཤར་ཕྱོགས་སུ་དྲག་ཆས་ཉེན་རྟོག་པས་མང་ཚོགས་ཁྲོད་གང་བྱུང་མེ་མདའ་བརྒྱབ་སྟེ། ཉུང་མཐར་བོད་མི་༥ དམར་གསོད་བཏང་བ་སོགས་ཀྱིས། བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་ཡོད་པ་ཧ་ཅང་གསལ་པོ་རེད། ༢༠༡༢ ལོའི་ཟླ་༡ ནས་དུས་ཡུན་ཟླ་གཉིས་ཙམ་རིང་བོད་ནང་རང་ལུས་མེར་བསྲེགས་གཏོང་མཁན་༡༦ བྱུང་བའི་ཁྲོད་མི་༡༣ འདས་གྲོངས་སུ་ཕྱིན་ཡོད། ཞི་རྒོལ་བྱེད་མཁན་དང་རང་ལུས་མེར་བསྲེགས་གཏོང་མཁན་སི་ཁྲོན་དང་མཚོ་སྔོན་ཙམ་མིན་པར། བོད་ཀྱི་ས་ཁུལ་གཞན་དག་ནང་དུའང་རྒྱ་ཁྱབ་ཏུ་འགྲོ་བཞིན་པར་སེམས་འཚབ་ཡོད་ ” ཅེས་འཁོད་འདུག
གསལ་བསྒྲགས་དེར་མུ་མཐུད་དུ་འཁོད་དོན། “ ད་བར་བོད་ནང་རང་ལུས་མེར་བསྲེགས་གཏོང་མཁན་ཚོས་བོད་ལ་རང་དབང་དགོས་པ་དང་། ༸གོང་ས་མཆོག་བོད་ལ་གདན་འདྲེན་ཞུ་དགོས་པའི་འབོད་ཚིག་བསྒྲགས་ཡོད་ལ། བུད་མེད་ལྷན་ཚོགས་ཀྱིས་རྒྱ་ནག་སྲིད་འཛིན་ཧུའུ་ཅིན་ཐོ་ནི། མི་དམངས་ཀྱི་བདེ་སྡུག་ལ་སེམས་ཁུར་དང་འགན་འཁྲི་མེད་པར་མང་ཚོགས་ལ་གཉའ་གནོན་བྱེད་མཁན་ཞིག་ཡིན་པར་ངོས་འཛིན་བྱེད་ཀྱི་ཡོད་ལ། ཁོང་དང་བོད་རང་སྐྱོང་ལྗོངས་དམར་ཤོག་དྲུང་ཆེ་ཟུར་པ་ཀྲང་ཅིན་ལིས་གཉིས་ཀྱིས། དུས་ཡུན་རིང་པོར་བོད་ནང་དྲག་པོའི་སྲིད་བྱུས་ལག་བསྟར་བྱས་པར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད། ང་ཚོས་རྒྱ་ནག་མགོ་ཁྲིད་ཞི་ཅིན་ཕིན་དང་། བོད་རང་སྐྱོང་ལྗོངས་དམར་ཤོག་དྲུང་ཆེ་ཁྲིན་ཆོན་ཀོ་གཉིས་ཀྱིས། བོད་ནང་ལ་བཟང་ཕྱོགས་ཀྱི་འགྱུར་བ་ཞིག་གཏོང་ཐུབ་རྒྱུར་རེ་བ་བྱེད་ཀྱི་ཡོད་། ཞིས་ཅིན་ཕིན་གྱིས་བོད་ནང་རང་ལུས་མེར་བསྲེགས་གཏོང་བཞིན་པའི་བོད་མིའི་འབོད་སྒྲར་ཉན་ཞིབ་དང་། བོད་ནང་གི་དངོས་ཡོད་གནས་སྟངས་ལ་རྒྱུན་ལོན་བྱས་ཏེ། བོད་མིའི་སྒྲིག་འཛུགས་ཀྱི་མགོ་ཁྲིད་དང་ལྷན་དུ་གྲོས་མོལ་བསྐྱར་གསོ་ཡོང་བའི་འབོད་སྐུལ་ཞུ་བཞིན་ཡོད་ ” ཅེས་འཁོད་འདུགམཐའ་མར་གསལ་བསྒྲགས་དེར་འཁོད་དོན། “ བུད་མེད་ལྷན་ཚོགས་ཀྱིས་ཨེ་ཤ་ཡའི་རང་བྱུང་ཁོར་ཡུག་ལ་གནོད་འཚབ་ཆེན་པོ་འབྱུང་བཞིན་པར་སེམས་ཁུར་ཆེན་པོ་བྱེད་ཀྱི་ཡོད། བོད་ནི་ཨེ་ཤ་ཡའི་རྒྱལ་ཁབ་ཁག་གི་ཆུ་བོའི་འབྱུང་ཁུངས་ཡིན་ལ། ཆུ་བོ་དེ་དག་བོད་ཀྱི་འདབས་འབྲེལ་རྒྱལ་ཁབ་ཁག་གི་མི་མང་དུང་ཕྱུར་མང་པོའི་འཚོ་བ་དང་ཐད་ཀར་འབྲེལ་བ་ཆགས་ཡོད། རྒྱ་གཞུང་གིས་བོད་ཐོག་འཛིན་པའི་ཁོར་ཡུག་གི་སྲིད་བྱུས་དེས་བོད་ཀྱི་རང་བྱུང་ཁོར་ཡུག་ལ་ཉེན་ཁ་ཆེན་པོ་བཟོ་བཞིན་ཡོད་སྟབས། བོད་ཀྱི་ཁོར་ཡུག་ལ་གཏོར་བཤིག་ཐེབས་ན་འདབས་འབྲེལ་རྒྱལ་ཁབ་ཀྱི་མི་ས་ཡ་མང་པོར་དཀའ་ངལ་འཕྲད་ངེས་ཡིན་ལ། གནས་སྟངས་དེར་དམིགས་ཏེ་ན་ནིང་ལོ་ནས་བུད་མེད་ལྷན་ཚོགས་ཀྱིས་༼བོད། འཛམ་གླིང་གི་སྣེ་གསུམ་པ་༽ཞེས་པའི་ཁོར་ཡུག་སྲུང་སྐྱོབ་ཀྱི་ལས་གཞི་སྤེལ་མགོ་བཙུགས་ཡོད་ ” ཅེས་སོགས་འཁོད་འདུགདེ་བཞིན་མཁན་རིན་པོ་ཆེ་མཆོག་དང་མི་མང་ཚོགས་གཞོན་བཅས་ནསམང་ཚོགས་ནས་བོད་རྒྱལ་ཁབ་ཆེན་པོའི་རྒྱལ་གླུ་གསུང་གནང་པ་དང་བདེན་ཚིག་སྨོན་ལམ་བཅས་གསུང་རྗེས་མཇུག་བསྡུས་གནང་སོང་། གསར་འགོད་པ། མཁར་འཕགས་ནས་ འདྲ་པར་་