བཙན་བྱོལ་བོད་གཞུང་བཀའ་ཤག

བཀའ་ཤག་ནི་བཙན་བྱོལ་བོད་གཞུང་མང་གཙོའི་ཀ་བ་གསུམ་གྱི་ནང་ཚན་འཛིན་སྐྱོང་གི་ལས་ཁུངས་མཐོ་ཤོས་དེ་ཡིན་ཞིང་། ༸གོང་ས་༸སྐྱབས་མགོན་ཆེན་པོ་མཆོག་ནས་འཛིན་སྐྱོང་གི་དབང་ལུང་ཆ་ཚང་བཀའ་ཤག་བརྒྱུད་ཁྱབ་བསྒྱུར་གནང་གི་ཡོད། བཀའ་ཤག་ལྷན་ཚོགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོའི་དབུ་འཁྲིད་འོག་གཞུང་གི་ཆབ་སྲིད་དང་འཛིན་སྐྱོང་གི་ལས་དོན་འགན་འཁུར་རྐང་ལེན་གནང་གི་ཡོད།

བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་བཀའ་ཤག་ཏུ་བཀའ་བློན་ཁྲི་པ་གཅིག་དང་། བཀའ་བློན་གཞན་བདུན་ལས་མ་མང་བ་ཞིག་དགོས་པ། བཀའ་བློན་ཁྲི་པ་བོད་མི་མང་ཚོགས་ཀྱིས་ཐད་ཀར་སྤྱི་ཡོངས་འོས་བསྡུའི་ལམ་ནས་འོ་འདེམས་བྱེད་པ་དང་། བཀའ་བློན་ཁྲི་པས་རང་གི་ཕྱག་སྦྲེལ་བཀའ་བློན་གཞན་རྣམས་འོས་འཛུགས་མིང་འདོན་གནང་བར་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མི་ཉུང་བའི་རྒྱབ་སྐྱོར་འཐོབ་དགོས་པ་ཡིན། བཀའ་བློན་རྣམ་པའི་ལས་རྒྱུན་ཡུན་ཚད་ལོ་ལྔ་ཡིན།།

བཀའ་དྲུང་ཡིག་ཚང་།

བཀའ་ཤག་གི་ཉིན་རེའི་ལས་དོན་ལག་བསྟར་ཞུ་མཁན་གྱི་ལས་ཁུངས་ཤིག་ཡོད་པ་དེ་ལ་བཀའ་དྲུང་ཡིག་ཚང་ཟེར་ཞིང་། ལས་ཁུངས་དེའི་སྤྱི་ཁྱབ་འགན་འཛིན་དུ་དྲུང་ཡིག་ཆེན་མོ་ཞིག་ཡོད་པར་བཀའ་དྲུང་ཞུས་ཀྱི་ཡོད། ལས་ཁུངས་དེས་ཆབ་སྲིད་དང་། འཛིན་སྐྱོང་། མང་ཚོགས་ཀྱི་བདེ་སྡུག་ལ་སོགས་པའི་ལས་དོན་མཐའ་དག་བཀའ་ཤག་ཏུ་སྙན་གསན་ཞུ་རྒྱུ་དང་། བཀའ་ཤག་གིས་ལས་དོན་ཐག་གཅོད་ཇི་བྱུང་བློན་ཆེན་ལས་ཁུངས་གཙོས་པའི་ལས་ཁུངས་ཁག་ལ་ཕྱག་བསྟར་ཆེད་ཁུངས་ཁྱབ་དང་མཇུག་སྐྱོང་ཞུ་རྒྱུ་ཡིན། བཀའ་དྲུང་ཡིག་ཚང་གི་ཁྱབ་ཁོངས་ལས་ཁུངས་གཉིས་ཡོད་པ། འཆར་འགོད་ལྷན་ཁང་དང་། ངེས་མེད་ལས་གཞི་སྡེ་ཚན་ཡིན།

བཀའ་དྲུང་ཡིག་ཚང་གི་སྡེ་ཚན།

བཀའ་དྲུང་ཡིག་ཚང་སྡེ་ཚན་དྲུག་ཏུ་དབྱེ་ཡོད།

༡༽ བཀའ་ཤག་ལྷན་ཚོགས་སྡེ་ཚན།
༢༽ གྲོས་ཚོགས་དང་འཆར་འགོད་འཛིན་སྐྱོང་སྡེ་ཚན།
༣༽ ཕྱི་བསྐྱོད་ལག་འཁྱེར་བཀའ་འཁྲོལ་སྡེ་ཚན།
༤༽ རྩིས་ཞིབ་སྙན་ཐོ་ཞིབ་འཇུག་སྡེ་ཚན།
༥༽ དོལ་རྒྱལ་ཞིབ་འཇུག་སྡེ་ཚན།
༦༽ འཛིན་སྐྱོང་སྡེ་ཚན།

བཀའ་ཤག་ལྷན་ཚོགས་སྡེ་ཚན།

བཀའ་ཤག་ལྷན་རྒྱས་ནམ་ཚོགས་སྐབས་བཀའ་དྲུང་དང་ལས་རོགས་བཅས་ནས་བཙན་བྱོལ་གཞུང་གི་ཆབ་སྲིད་དང་། སྤྱི་ཚོགས། འཕྲོད་བསྟེན།དཔལ་འབྱོར་ལ་སོགས་པའི་སྐོར་བཀའ་ཁྲི་མཆོག་ནས་བཀའ་ཕེབས་དང་། ཡང་ན་འབྲེལ་ཡོད་ལས་ཁུངས་ནས་འཆར་འབུལ་གནང་བ་ཁག་བཀའ་ཤག་ལྷན་ཚོགས་ནང་བཀའ་བསྡུར་གནང་ཆེད་གྲོས་གཞི་བཟོ་རྒྱུ་དང་། ལྷན་ཚོགས་ནང་བཀའ་བསྡུར་ཐག་གཅོད་ཇི་བྱུང་གྲོས་ཆོད་ཡིག་ཐོག་བཀོད་རྒྱུ།དེ་བཞིན་བཀའ་ཤག་ལྷན་རྒྱས་ནང་བཀའ་མོལ་ཇི་བྱུང་སྒྲ་འཛིན་འཕྲུལ་འཁོར་ནང་བཅུག་ནས་བདག་ཉར། གྲོས་ཆོད་དགོངས་དོན་འབྲེལ་ཡོད་ལས་ཁུངས་སོ་སོར་ཁུངས་ཁྱབ་བྱ་རྒྱུ་བཅས་ཡིན།

གྲོས་ཚོགས་དང་འཆར་འགོད་འཛིན་སྐྱོང་སྡེ་ཚན།

བོད་མི་མང་སྤྱི་འཐུས་རྒྱུན་ལས་དང་གྲོས་ཚོགས་ནང་དྲི་བ་བྱུང་ཁག་ལ་གསལ་བཤད་ལན་འདེབས་ཟིན་བྲིས་བཟོ་རྒྱུ་དང་། སྤྱི་འཐུས་རྣམ་པ་ཕྱོགས་མཐའ་ཁག་ལ་འཚམས་གཟིགས་ཕེབས་པའི་མང་ཚོགས་ཀྱིས་བདེ་སྡུག་དང་དྭོགས་འདྲི་ཞུས་པའི་ལས་བསྡོམས་གནང་འབྱོར་ཁག་འབྲེལ་ཆགས་ལས་ཁུངས་སོ་སོ་ནས་གསལ་བཤད་སོགས་ཇི་དགོས་བླངས་ཏེ་སྤྱི་འཐུས་ལྷན་ཁང་ལ་གསལ་བཤད་ཞུ་དགོས་རགས་ཟིན་འགོད་རྒྱུ། གྲོས་ཚོགས་སྐབས་ལས་ཁུངས་སོ་སོའི་དངོས་ཡོད་ལས་དོན་དང་འབྲེལ་བའི་གཞུང་འབྲེལ་གྲོས་འཆར་དང་སྒྲིག་ཟིན་བཟོ་རྒྱུ་དང་། བསྐྱར་བཅོས་དང་གྲོས་འཆར་འདོན་དགོས་རྒྱུ་མཚན་དང་རྒྱབ་ལྗོངས་གནས་ཚུལ་བཅས་ཕྱོགས་སྒྲིག་བྱ་རྒྱུ་བཅས་ཡིན།

ཕྱི་བསྐྱོད་ལག་འཁྱེར་བཀའ་འཁྲོལ་སྡེ་ཚན།

བཙན་བྱོལ་གཞུང་གི་ཆབ་འབངས་སུ་གཏོགས་པའི་བོད་མི་བཙན་བྱོལ་བ་སུ་རུང་དང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་འདུ་དང་གཉེན་འཕྲད། ཤེས་ཡོན་དང་ལས་རིགས་སློབ་སྦྱོང་། གཞན་ཡང་ནང་མི་ཟླ་བསྒྲིལ་བཅས་སུ་བསྐྱོད་ཆོག་པའི་བཙན་བྱོལ་གཞུང་གི་ཕྱི་བསྐྱོད་ལག་འཁྱེར་བཀའ་འཁྲོལ་སྲིད་བྱུས་གཏན་འབེབས་ལྟར་ཞིབ་དཔྱད་ཞུས་ཏེ་བཀའ་འཁྲོལ་གཏོང་རྒྱུ་བཅས་ཡིན།

དོལ་རྒྱལ་ཞིབ་འཇུག་སྡེ་ཚན།

དོ་རྒྱལ་དང་འབྲེལ་བའི་ད་ཕན་གྱི་ཞིབ་འཇུག་ཡིག་ཆ་ཉར་རྒྱུ་དང་དེ་འབྲེལ་དོལ་རྒྱལ་སྐོར་གནས་ཚུལ་གསར་པ་ཇི་བྱུང་ལ་རྟོགས་ཞིབ་ཀྱིས་འབྲེལ་ཡོད་གོང་རིམ་ལ་སྙན་གསན་ཞུ་དགོས་ཀྱི་མཚོན་ལ་ས་དོན་ཇི་ཡོད་བྱ་རྒྱུ་བཅས་ཡིན།

རྩིས་ཞིབ་སྙན་ཐོ་ཞིབ་འཇུག་སྡེ་ཚན།

བཙན་བྱོལ་གཞུང་གི་དབུས་ལས་ཁུངས་ཁག་དང་ཡན་ལག་སྡེ་ཚན་ཁག་གི་རྩིས་ཞིབ་སྙན་ཐོ་ཁག་ལ་ཞིབ་འཇུག་གིས་སྐྱོན་གནང་ཇི་ཡོདཟུར་འདོན་གྱིས་བཀའ་ཤག་ལ་སྙན་གསན་ཞུ་རྒྱུ་དང་། འབྲེལ་ཡོད་ལས་ཁུགས་ལ་ཞིབ་འཇུག་ཐག་གཅོད་ཇི་འོས་བཀའ་ཕེབས་དགོངས་དོན་ལན་ཟིན་བཟོ་རྒྱུ། རྩི་ཞིབ་ལས་ཁུངས་ཀྱི་དུས་ནས་དུས་སུ་དྭོགས་འདྲི་ཞུ་ཁག་དང་ལོ་མཇུག་མཚམས་ཕྱོགས་བསྡོམས་སྙན་ཐོ་ཕུལ་ཁག་ལ་ཞིབ་འཇུག་གིས་ལན་ཟིན་བཟོ་རྒྱུ། གཞན་ཡང་དབུས་ལས་ཁུངས་ཁག་དང་ཁྱབ་ཁོངས་སྡེ་ཚན་ཁག་ནས་གཞུང་འབྲེལ་ལས་དོན་ཆེད། སྒྲིག་གཞི་དགོངས་དོན་གྱི་ཕྱོགས་བསྐྱོད་བསྐྱོད་བཀའ་འཁྲོལ་ཞུས་རིགས་ལ་ཞིབ་འཇུག་དང་བཀའ་འཁྲོལ་ཡིག་ཆུང་གཏོང་རྒྱུ། བར་བརྒལ་བཀའ་འཁྲོལ་འབྱོར་རིམ་བཞིན་ཞིབ་འཇུག་གིས་སྤྱི་འཐུས་རྒྱུན་ལས་ལ་རྒྱབ་གཉེར་ཞུ་སྙན་འབུལ་རྒྱུ་དང་བཀའ་འཁྲོལ་ཐོན་མཚམས་ཁུངས་སོ་སོར་ཁུངས་ཁྱབ་གཏོང་རྒྱུ་བཅས་ཡིན།

འཛིན་སྐྱོང་སྡེ་ཚན།

ཀ༽ བཀའ་བློན་ཁྲི་པའི་སྒེར་དྲུང་ཚན་པ།
ཁ༽ ལས་བྱེད་བཀོད་སྒྲིག་ཚན་པ།
ག༽ རྩིས་ཁང་ཚན་པ།
ང༽ སྤྱི་ཡོངས་ལས་ཁུངས་ཚན་པ།
ཅ༽བོད་རྒྱ་ཞི་མོལ་ཚན་པ།

བློ་ཆེན་ལས་ཁུངས་ཁག

༡༽ ཆོས་རིག་ལས་ཁུངས།
༢༽ ནང་སྲིད་ལས་ཁུངས།
༣༽ དཔལ་འབྱོར་ལས་ཁུངས།
༤༽ ཤེས་རིག་ལས་ཁུངས།
༥༽ བདེ་སྲུང་ལས་ཁུངས།
༦༽ ཕྱི་དྲིལ་ལས་ཁུངས།
༧༽ འཕྲོད་བསྟེན་ལས་ཁུངས།

<	ཕྱི་ཟླ་ ༡༢ – ༢༠༢༤					>
ཟླ་བ་	མིག་དམར་	ལྷག་པ་	ཕུར་བུ་	པ་སངས་	སྤེན་པ་	ཉི་མ་
						༡
༢	༣	༤	༥	༦	༧	༨
༩	༡༠	༡༡	༡༢	༡༣	༡༤	༡༥
༡༦	༡༧	༡༨	༡༩	༢༠	༢༡	༢༢
༢༣	༢༤	༢༥	༢༦	༢༧	༢༨	༢༩
༣༠	༣༡